How To Prepare Effectively For Board Exams (In Hindi)

Board Exams Ki Taiyaari Kaise Kare

Board exams sir par hain aur taiyaari abhi hui nahi hai to in tips se aap acchhe se boards exam ki taiyaari kar sakte hai aur acchhe marks se pass bhi ho sakte hain. 

Board exam koi bahut bada bhoot nahi  hai isse darna nahi chahiye. Ye sirf ek exam hai jisse ye pata chalta hai ki aapne kitni mehnat ki hai. Kisi bhi exam se kisi ki kabiliyat ka pata nahi chalta. Ho sakta hai jo kisi exam mein acchha perform na kar sake wo aage chalkar kisi aur field mein accha kar jaaye.

1. Make Time Table

Timetable sabse jaruri cheej hai aapki exam preparation mein. Agar aap bina time table ke taiyaari karte hain to ho sakta hai ki aap kisi din 1 ghanta padhe aur kisi dusre din do ghante aur kisi teesre din fi ek ghante ke liye padhe to aapka padhai mein interest bhi ghat jayega aur padhne mein maja bhi nahi aayega. Isiliye jaruri hai ek timetable banana aur usi ke hisaab se din bhar kaam karna. Apne pure din ka ek timetable banao aur use apne jeevan mein lagoo karke dekho.

2. Set Your Target

Apna ek target set karo ki mujhe ye subject itne dino me pura cover karna hai aur ye topic itne dino me. Koshish karo ki aap un subjects ya topics ko usi time mein cover kar lo. Bache huye har mahine, har din aur har ghante mein ye tay karlo ki itni padhai to karni hi hai chahe jo ho jaye. Kabhi bhi ye na soche ki are abhi to bahut din bache hain ye kar loonga. Nahi. Apne target ko adhoora na chhode. Apne saara course kam se kam 1 mahine pehle hi pura kar len. Iske baad saara time revision mein de.

3. Give Time to Hard Subject

Agar aap kisi subject mein kamjor hain ya fir koi subject aapko hard lagta hai to use jyada time de. Agar aapke exam ki date najdeek aa gayi hai to aap us subject ko chhod de aur jo subjects aapko easy lagte hain pehle unhe padhe varna agar aap hard wale subject ke peeche hi lage rahoge to aapka easy waala subject chhoot jayega jisme aap kahin jyada acchhe number laa sakte ho. Asaan subjects ko pura karne ke baad bacha hua samay hard subject ko de. Use chhode nahi. Aap ye mat sochiye ki ek subject mein kum number laakar dusre mein jyada number le aaunga to aap galat soch rahe hain kyunki percentage sabhi subjects ko milakar banti hai naki ek ya do subjects ko.

4. Make Notes

Jo bhi yaad karte jaye unhe ek paper par likhkar jarur dekhen. Isse aapka ek baar revision bhi ho jaayega aur aapko pata bhi chal jaayega ki ise likhne mein kitna time lagega aur aap usi hisaab se exam mein time management kar sakte hain. Isse aapko pata chal jaayega ki kis subject ko kitna time dena hai aur pura paper solve karne mein kitna time lagega.

5. Don't Underestimate NCERT

NCERT ki books ko najarandaaz karne ki galti kabhi naa kare. Kayi log alag alag kitaabo se taiyaari karte hain. Acchi baat hai jitni jyada taiyaari aap kar sakte hain kariye. Par NCERT ki books ko jarur padhiye aur baar baar padhiye aur unme diye huye questions ko solve karne ki koshish kijiye. Exam paper mein jyadatar questions NCERT ki books ke hi hote hain. Agar aap sirf NCERT ki books se bhio taiyaari karte hain to aap asaani se pass ho jayenge par agar aapko jyada percentage laani hain to aap NCERT ke saath saath dusri books bhi padhiye.

6. Do More Practice

Jyada se jyada practice karo. Jitna jyada aap practice karenge utna hi aapko wo topic acchhe se yaad ho jayega. Practice karne ke liye aap pichle varshon ke papers ko solve kar sakte hain iske saath aap model paper aur sample papers ko solve karne ki bhi koshish karen. Isse aapko pata bhi chalega ki paper kis tarah ka aata hai aur aapki practice bhi acchi ho jayegi. 

7. Time Management For Exams

Exam deta samay aapko pata hona chahiye ki on sa question kitna time le sakta hai iskeliye aap sample papers, model papers aur previous years papers use kar sakte hain. Sabse pehle un sawalon ko karon jo kam samay mein pura ho jaaye isse jyada samay wale sawalo ke liye aapko time mil jaayega. Jo question aapko aata nahi ya kuch kuch aata hai to use last ke liye chhod de. Aesa nahi kare ki aap usi sawal par lage rahe baar baar aapka answer sahi nahi aa paa raha ho fir bhi aap usi par lage rahe to sara samay samapt ho jayega aur aap kuch bhi nahi kar payenge. To pehle asaan sawaal fir hard sawaal kare. Sample papers ke liye aap is link par jaa sakte hain. 
                                                       Visit CBSE

Ummeed karta hun ki ye post aapko acchha laga hoga please ise share jarur kare. Aapka koi bhi sawaal hai to neeche comment box mein likh den.